يوميات عم رمضان مرة وعدت والرب سلم
يوميات عم رمضان
مرة وعـدت والرب سلم
صابحة
مال وشك يا شيخ حسن سلامتك
الشيخ حسن
مين إنت ؟
صابحة
أنا صابحة يا شيخ حسن
الشيخ حسن
صابحة بنت ستهم ؟
صابحة
وليه ما تقولش صابحة بنت الطوخى
يسلم أبويا ويفضل حسه فى الدنيا
الشيخ حسن
ياساتر طالعة لأمك بلسانين
صابحة
ما قلتليش إيه إللي مورم وشك كدة
الشيخ حسن
حساسية
صابحة
حساسية ولا سووك فى مصر
الشيخ حسن
مين دول يا طويلة اللسان
صابحة
حلاوتهم ما فضحت الدنيا وقالت إنهم سووك فى مصر إنت وشيحه إبن أبو اسماعين والكفر كلاته عرف
الشيخ حسن
دتك داهية تاخدك إنت وحلاوتهم وكل نسوان الكفر
إللي ملهمش شغلة إلا سيرة الخلق
صابحة
طيب خد بالك وإنت ماشى أحسن تنكفى على وشك وإنت مش ناقص
عوضين
فيه إيه يا صابحة ؟ مالك ومال الشيخ حسن؟
صابحة
وإيه ياخويا إللي حيكون بينى وبينه
أنا كنت بأسئله إيه إللي مورم وشه كدة
الشيخ حسن
إزيك يا عوضين
عوضين
الله يسلمك يا شيخ حسن
سمعت إنك نزلت مصر
حمد لله على سلامتك
الشيخ حسن
الله يسلمك
عوضين
إنت نزلت إمتى ورجعت إمتى وصحيح إيه إللي مورم وشك كدة ؟
الشيخ حسن
تعالى الأول وصلنى لدار عمك الشيخ رمضان ونبقى نتحدت واحنا ماشيين
عوضين
أنا كمان واحشنى عم رمضان ونفسى أشوفه
الشيخ حسن
خلاص تعالى معاى وهناك أبقا أحكيلكم إيه إللي حصللى فى مصر
عوضين
وهو كذلك هات إيدك
توكلنا على الله
**********
عوضين
ياجماعة ياللي هنا
الشيخ حسن
يا شيخ رمضان
يارب ياساتر
عم رمضان
مين الشيخ حسن
كنت غطسان فين بقالك يومين ؟
وإيه إللي عمل فيك كدة ؟
الأول إتفضلوا جوه
إتفضل يا عوضين
عوضين
يزيد فضلك ياعم رمضان
هات إيدك يا شيخ حسن
هات العصايا لما أركنهالك
عم رمضان
وإيه الورم إللي فى وشك ده
وهل ده إللي خلاك تغطس يومين ما أشوفكش
عوضين
مانا سئلته وقاللي لما نروح عند عمك الشيخ رمضان أبقا أحكيلكم
عم رمضان
طيب إستنوا الأول لما نولع علشان نسوى حبة شاى
ناولنى يا عوضين المنئد من عندك والقوالح قدامك أهى وجنبهم البراد والكبايات
الشيخ حسن
يعنى يا شيخ رمضان ما سمعتش حاجة كدة ولآ كدة
عم رمضان
سمعت إنك نزلت مصر يوم الجمعة بدرى مع الواد شيحه إبن أبو اسماعين وإمبارح لما حضرتك ماجتش قلت يمكن بيريح من المخمضة بتاعة مشوار مصر
الشيخ حسن
بس كدة
عم رمضان
ليه هو فيه حاجة تانى
الشيخ حسن
الحمد لله ده أنا كنت خلاص حاموت وماتشوفوش وشى تانى
عم رمضان
ياساتر يارب
إيه إللي حصل
الشيخ حسن
أنا بعد ما مشيت من عندك ليلة أول إمباح يادوب وصلت الدار ولقيت إللي بينده عليا
قلت مين إللي بينده
قاللي أنا شيحة يا شيخ حسن
عم رمضان
أنا سمعت إن الواد ده بقى مدروش وماشى مع بتوع الموالد وحلقات الذكر إللي بيقعدوا يطّوحوا فيها يمين وشمال وسارح مع الجماعة دول وكمان ربى دقنه
الشيخ حسن
المهم قلتله خير يا شيحة فيه حاجة ؟
أنا قلت فى عقل بالى يمكن عاوزنى أأقرا فى مولد من الموالد إللي بيعملوها
قاللى صلى على إللي حيشفع فيك
قلتله اللهم صلى عليه
قاللي بقى ليلة إمبارح رأيت رؤيا طيبة
قلتله خير إن شاء الله
قاللي لقيت نفسى بأصلى الجمعة فى سيدنا الحسين
قلت رَحْمَتُ اللَّـهِ وَبَرَكَاتُهُ عَلَيْكُمْ أَهْلَ الْبَيْتِ ۚ إِنَّهُ حَمِيدٌ مَّجِيد
قاللي ولقيتك إنت يا شيخ حسن بتصلى جنبى
قلت يانور النبى
قاللي وده إللي خلانى أجيلك دلوقت علشان تنزل معاى مصر بكرة إن شاء الله نصلى الجمعة فى الحسين
ومصاريفك ومواصلاتك كلها عليا مش حتدفع ولا مليمقلت إيه ؟
قلتله قلت على بركة الله
قاللي يبقى كدة حااعدى عليك بمشيئة الله الساعة سبعة الصبح وتكون جاهز
قلتله يعنى بلاش أجيب فلوس معايا
عم رمضان
إيه بار وعتب ؟
الشيخ حسن
أهى عزومة
عم رمضان
وقالك إيه ؟
الشيخ حسن
ضحك وقاللي لأ خلى عنك خالص أنا إللي عازمك
قلتله خلاص حابقى جاهز من النجمة
وفعلاً جاللي فى الميعاد وكنت مجهز نفسى وأخدنا بعضنا وتوكلنا على الله
أخدنا أول ميعاد من على الكوبرى والحمد لله الأتوبيس كان رايق علشان كان يوم الجمعة
عم رمضان
وبعدين ؟
الشيخ حسن
قابلنا الواد حنتش فى الأتوبيس هو وامه
عم رمضان
مين حنتش ده ؟
الشيخ حسن
ياأخى الواد حنا إبن هانم الهاتمة
عم رمضان
أنا أعرف هانم الهاتمة بس الواد ده مش متذكره
الشيخ حسن
ده كان تملي يقف يساعد أبوه فى الدكانة بتاعة العطارة
عم رمضان
أيوووه إفتكرت الواد إللي كان بيقف مع مرقس فى الدكانة
بس ده صغير مش كبير
الشيخ حسن
دلوقت بقى شاب طول بعرض وجرم
عم رمضان
المهم وبعدين
الشيخ حسن
شيحه سئله على فين يا حنتش ؟
حنتش قال نازلين مصر
شيحه سئله خير فيه حاجة ؟
حنتش قال امى محتاجة عملية ضرورى
شيحه سئله هى بتشكى من إيه ؟
ردت هانم وقالت عندى حصوة كبيرة فى الكلى والحكيم قال إنى محتاجة عملية
وحنتش لما سئل عندنا فى الكنيسة أبونا قال تروح بيها الكنيسة المرقسية فى مصر وتقدم طلبة بالحالة وهما حيعملوا اللازم
عوضين
هما بيعملوا عمليات فى الكنيسة
عم رمضان
إصبر إنت يا عوضين كمل يا شيخ حسن
الشيخ حسن
أنا سئلت الواد حنتش وقلتله إزاى يعنى الطلبة دى
قاللي بنكتب ورقة فيها إسم امى والعنوان وبتشتكى من إيه والحكيم قال إيه وإنها محتاجة لعملية علشان الحصوة إللي عندها وبنسلم أبونا إللي فى الكنيسة الطلبة دى وهو بياخدها منا وبعدين يقوللنا روحوا إنتوا والفرج حيجى
قلتله وبتدفعوا فلوس على كدة ؟
قاللي إحنا بعنا الحمارة بتاعتنا على قرشين كنت محوشهم علشان ندفع لأبونا
قلتله وإيه إللي بيتم بعد ما ياخد منكم الطلب والفلوس
قاللي أبونا بيقعد يصلى ويبخر ويقرا الطلبة بتاعتنا
علشان أم النور تسمع أو قديس من القديسين يسمع ويتبرع ويعمللها العملية
قلتله يعمللها العملية فى المستشفى ؟
قاللي لأ يا عم الشيخ حسن ده إللي بيجيلها بيجيلها فى الحلم وهى نايمة إذا كانت أم النور أو قديس من القديسين
يعنى لو حظها حلو حتجيلها أم النور فى الحلم وهى لابسة البالطو الأبيض وتحت باطها العدة بتاعتها وتعمللها العملية أو يجيلها القديس أبو شخشيخه
لو أم النور مش فاضية
الواد شيحه قال لحنتش وهى أم النور ما تعرفش تشفيها بدون عملية وبدون عدة
قمت أنا غمزت شيحه فى جنبه علشان ما يزودش فى الكلام ويخلى هانم تقوم علينا
أنا قلت لحنتش ربنا يشفى أنا قصدى على عقله
هو إفتكرها على امه فقال يارب يا شيخ حسن بس إنت إدعيلها
قلتله وهى محتاجة دعواتى فى إيه ؟
ده كفاية إن أم النور حتكون معاها بعدتها
المهم نزلنا كلنا فى الموقف
والواد شيحه قال لحنتش أنا والشيخ حسن حنيجى نوصلكم الأول وبعدين نروح مشوارنا مش كدة يا شيخ حسن
قلتله إومال ده الإسلام بيأمرنا بمساعدة المحتاج
هى الكنيسة دى فين يا حنتش
قاللي أبونا قاللي الكنيسة المرقسية فى شارع كلوت بك
رد شيحه وقال إيه الاسم البايخ ده ؟
قلتله ده يا سيدى إسم دكتور فرنساوى من أيام الحملة الفرنسية وسموا الشارع على إسمه
قاللي دول غيروا أسماء الشوارع كلها يا شيخ حسن
إشمعنى الاسم ده إللي مش عاوزين يغيروه
المهم إننا مشينا فى الشارع ده يا شيخ رمضان والواد شيحه بقى مستغرب ويقول إيه كل البوتيكات دى
قلتله إنت شايف إيه يا شيحه ؟
قاللي محلات كتير للمداسات يا شيخ حسن
لو عاوز تشترى مداس جديد المداسات هنا أشكال وألوان ؟
قلتله مرة تانية
قاللي وتانية ليه ماحنا فيها أهو
قلتله مش وقته وكمان علشان قلتلك أجيب فلوس معايا قلتلى ملوش لزوم
المهم واحنا ماشيين لقينا واحد بينده ويقول ياهانم ياهانم تعالى إتفضلى الظاهر إن فيه واحدة كانت بتشترى مداس لها ومالدش عليها السعر فخرجت من البتيك ده إللي بيقولوا عليه فالبياع خرج ينده عليها علشان ترجع
المشكلة مش هنا المشكلة إن الواد حنتش ركبه ميت عفريت وعاوز يعرف الراجل ده عرف إسم امه إزاى
وراسه وألف سيف عاوز يرجع يشبط فى الراجل
المهم إن امه قالتله مش يمكن دى بركة القديس أبو شخشيخه والولـه العبيط صدق
عم رمضان
وبعدين
وصلناهم للكنيسة ومشينا رحنا على سيدنا الحسين
الواد شيحه قاللي يا سلام على منظر السياح يا شيخ حسن
قلتله شكلهم إيه يا ولـه
قاللي بياض إيه وحلاوة إيه ومتجمعين على المحلات بتاعة الشيش والأنتيكات والجلابيب
قلتله بطل تبص علشان رايحين نصلى
المهم جينا عند الباب وقلعنا المداسات بتاعتنا الواد شيحه قاللي خد مداسك فى إيدك أحسن السياح يسرقوه علشان هما بيحبوا الحاجات الأثرية
قلتله فكرك كدة ؟
معقولة ولاد ألبالسة دول يعملوها ويخلونى أرجع البلد حافى
قاللي خليك ناصح زي حالاتى
عم رمضان
الله إومال وشك ورم من إيه ؟
الشيخ حسن
صبرك بالله يا شيخ رمضان
عم رمضان
ونعم بالله
الشيخ حسن
صلينا الجمعة والحمد لله وخرجنا من سيدنا الحسين والواد شيحه قال يالا بينا على ميدان التحرير
قلتله تصدق يا شيحه كنت عاوز أأقولك تاخدنى ميدان التحرير بس إنكسفت منك
قاللي كدة بردو يا شيخ حسن ما تقوليش إللي فى نفسك
قلتله الحمد لله أهى جت منك
قاللي بس نروح إزاى وأنا مش عارف السكة
المهم سئل واحد ماشى وقال للراجل إزاى نروح ميدان التحرير
الراجل قال لشيحه لما تلاقى كام شاب ماشيين
مع بعض إمشوا وراهم حتلاقوا نفسكم فى ميدان التحرير
قلنا تمام كدة
قلتله مش كنا ناكل لنا لقمة الأول يا سيد شيحه
أنا جايب معايا صرة فيها رغيفين وحتة جبنة
قاللى لما نروح هناك
ده هناك حناكل أكل يا شيخ حسن ما اقولكش
قلتله متأكد
قاللي حط فى بطنك بطيخة صيفى
إستعد يا شيخ حسن أنا شايف خمس شباب جايين هناك أهم
جهز نفسك علشان نمشى وراهم
وبقينا ماشيين ورا الشباب دول يقفوا نقف وراهم يمشوا نمشى وراهم وخد عندك بقا كل شوية يقفوا ويهزروا مع بعض ويضربوا بعض ويشتموا بعض ويعاكسوا الحريم فى السكة ويتمقلتوا على إللي رايح وإللي جاى وأخر قلة أدب والواد شيحه يقوللي بقا دول الشباب بتوع التحرير
قلتله دول عينة بس يمكن الباقى كويس يا شيحه
قاللي ما الجواب بيبان من عنوانه يا شيخ حسن
عم رمضان
وبعدين يا شيخ حسن
الشيخ حسن
فضلنا ماشيين وراهم لحد ما لقيت شيحة بيقوللي ياخبر يا شيخ حسن
قلتله فيه إيه ؟
قاللي الظاهر احنا غلطنا لما مشينا ورا العيال دى زى الراجل ما قاللنا
قلتله ليه ؟
قاللي العيال دى طلعت إنها رايحة السوق مش ميدان التحرير يا خسارة تعبنا ده كله والمشوارإللي جه على الفاضى
قلتله إنت شايف إيه ؟
قاللي بياعين كتير وناس بتشترى وشايف خيم كمان
قلتله يمكن دى وكالة البلح إللي بيقولوا عليها ؟
قاللي مش عارف بس باين عليه إنه سوق
قلتله طيب هو زى إيه ؟
قاللي شكله بالظبط زى المولد بس صاحبه غايب
قلتله شفت بقى إنك كنت ظالم الناس بتوع التحرير
قاللي طيب إستنى بقى لما أسئل أى بياع من دول إزاى نروح الميدان
ووقف عند واحد من البياعين وسئله لو سمحت ياحاج نروح ميدان التحرير إزاى ؟
إن شاء الله نكمل عند التفاعل
رد مع اقتباس
المشاركة الأصلية كتبت بواسطة عبد الرحمن احمد عبد الرحمن
المفضلات