منظومة للأمة العربية وللشعوب الإسلامية> سيرة الرسول صلى الله عليه وسلم بالموال الشعبي

[عاشق حب الله والرسول]

:007:

" مُحَمَّدٌ رَسُولُ اللَّهِ ۚ وَالَّذِينَ مَعَهُ أَشِدَّاءُ عَلَى الْكُفَّارِ رُحَمَاءُ بَيْنَهُمْ ۖ تَرَاهُمْ رُكَّعًا سُجَّدًا يَبْتَغُونَ فَضْلًا مِنَ اللَّهِ وَرِضْوَانًا ۖ سِيمَاهُمْ فِي وُجُوهِهِمْ مِنْ أَثَرِ السُّجُودِ ۚ ذَٰلِكَ مَثَلُهُمْ فِي التَّوْرَاةِ ۚ وَمَثَلُهُمْ فِي الْإِنْجِيلِ كَزَرْعٍ أَخْرَجَ شَطْأَهُ فَآزَرَهُ فَاسْتَغْلَظَ فَاسْتَوَىٰ عَلَىٰ سُوقِهِ يُعْجِبُ الزُّرَّاعَ لِيَغِيظَ بِهِمُ الْكُفَّارَ ۗ وَعَدَ اللَّهُ الَّذِينَ آمَنُوا وَعَمِلُوا الصَّالِحَاتِ مِنْهُمْ مَغْفِرَةً وَأَجْرًا عَظِيمًا "(29) ( صدق الله العظيم )

أقدم هذه المنظومة من شعر الربابة والموال الشعبي لبعض الأسباب علها تحوز رضاكم وإ عجابكم ، من هذه الأسباب :ـ
1ـ تقديم الأحكام إلى الجمهور بلغته .
2ـ تيسيراً على المستويات المختلفة .
3ـ إشاعة العلم من أيسر طُرُق الفهم عند الناس .
سيكون فيها روائع الحكم ، وبدائع الحق ، في لفظ سهل ، وتركيب أخاذ ، وكلمة حبيبة
بعيدة عن العصبية والنجعة الصوفية .... بحيث يقرؤها المصري والشامي واليمني و المغربي والعراقي وكانما أُختيرت من أجلة أو نُظمت لترضيه وتُشجيه دون سواه .

[walaa bent aleslam]

جزاااااك الله خير اخي
متابعين بازن الله

[عاشق حب الله والرسول]

الجزء الأول ويتكون من فصلين .
الفصل الأول :ـ

-({ أبو الأنبياء })-

أوحد الله ، وأصلي عاطر الصلوات ... على أبو الأنبياء وأهدي إليه سلامات واذكر له هجرة التاريخ سجل لها صفحات ... مكتوبه بالصبر ، في التوراه ، وفي الإنجيل وفي الكتاب الحكيم ، يقراها جيل ورا جيل ... هجرة أبونا الخليل ، والطفل إسماعيل جد الرسول الجليل ، هجره لها كرامات *** كان عنده زوجه وفيه ، اسمها ساره ... تغير عليه م الهوا ، من همسه من جاره والزوجه من طبعها على زوجها غياره ... كانت تبادله سعاده ، وشوق ، وحنيه أهدت له في يوم هديه .. جاريه مصريه ... نهار ما وِلدت .. قالت له .. يانا ياهيا مش طايقه أشوف دي البنيه .. وطيّرت غاره *** مش طايقه أشوف طفل من جاريه . وأنا الحرَّه ... ما شقنيش الضَّنا .. ما شفتهم مره !! أنا اللِّي عايشه معاك ع الحلوه والمُرَّه ... ياريتني ما كنت يوم سلمت لك هاجَر أنا كنت باحسب حتبقى لجاريتي هاجِرْ ... شيلها وشيل إبنها .. من أرضنا هاجِر مش عايزه أشاجِر .. سيبوني .. أُخرجوا برَّه *** فِضل أبونا الخليل ، باللين يحايلها ... وبالكلام الجميل ، يُخْطُب شمايلها لكن خيال اسماعيل ، داير يخايلها ... بيغاغي ، ويناغي ، ويغرّد كما الطاير وكل ما تشوفُه تِذَّكَّر إنها عاقِر ... تِسُوق دلالها ، وتفضل في النبي تناقِر وهوَه صابِر ، وخايف من عمايلها *** صِحي الخليل إبراهيم م النوم في صُبح نهار؟ ... لقى اسماعيل وأُمُه بَرَّه .. مطرودين م الدار والطفل عمال بيبكي ، خلَّى دمعه انهار ... فكَّر في عِند العنيدَه .. وانشغل بالُه وخاف على الطفل .. لاتقايس وتِغتالُه ! ... طَبطَب على أُمُه وخَدُه من كِتفها شَالُه وراح لِحَالُه .. وهِوَّه مُشَرَّد الأفكار ***

[عاشق حب الله والرسول]

هاجِر أبو الأنبيا .. سيِّدنا إبراهيم ... مِشي خَطاوي راسِمها بحِكمتك ياحكيم لطفل مطرود ، عشان موعود ، بأمر عظيم ... هاجِر ، مِصاحِب لهَاجَر ،وابنها المولود لِحِكمه يعلم مداها ، ربِّنا المعبود ... لدور كبير راح يقوم به .. هوَّه بيه موعود فيه الهدى للوجود .. فيه رحمِتك يارحيم *** القافله سايره مُطيعه ، في حِما الستار ... جاريه وفيّه ، وديعه ، أب م الأبرار لطفل حيكون وديعه ، تِحرُسُه الأقدار ... يطووا الليالي ، ليالي غِيرها تِطويهم والرمل يِسخَن ، يِلسوعهم ، ويِكويهم ... والصَّبر قُوتُهم ، وإيمانهم بيرويهم ومسَلِّمينها لِباريهم ، في ليل ونهار *** كان الخليل إبراهيم ، صابر .. ولا أيوب ... لكن على الطفل قلبُه م الحنان بيدوب والطفل مُش داري باللِّي ع الجبين مكتوب ... ما حد عارف في أنهي حِتَّه قِبلتهم لِحد أمر الإلَه ما أنهىَ رِحلتهم ... حطوا رِحالهم ، رمال الصحرا قِبلتهم واستقبلِتهم ، بدون مأكول ، ولا مَشروب *** أُقَفْ هنا يازمان وَقفة خُشوع وإيمان ... اسكتْ وطيل السُكوت ، اُسكت كمان ، وكمان تقدر تقول إيه على اللِّي قلبُه فيه بُركان ... وجِه يِنَفِّذ إرادة ربنا وأمرُه ويُترُك ابنه لصاحب الأمر في أمرُه ... تقدر تقول إيه على المغلوب على أمرُه ؟ على ابن عُمرُه ، وحايسيبه ‘ جعان ، عطشان !! *** ماتقولش حاجه ، وسيب الأب ويا ضَناه ... ودَمعُه نازل على خدودُه ، وهمُّه ضَناه والطفل عمال يشابي ، ع اللي دهرُه حناه ... براهيم يقول لاسماعيل ، سامحني يا إبني دي بسمِتك فوق شفايفك راح تِدَوبني ... ما تقولشي يا والدي رايح فين وسايِبني أنا وَدَعتك يا إبني بين أيادي الله *** مِشي أبو المسلمين ، والدَّمع مالي عْنيه ... مِشي .. مابصِّش وراه .. شاف اللِّي حاصل إيه !! كان اسماعيل الصغير .. لسه مادِدْ له إِديه ... وهَاجَر المؤمنه .. نور ربنا الرحمن ؟ بيفيض على إبنها ، من قلبها الولهان ... وترضَّعْه صَبرها ، من صَدرها ، بحنان راضيه قوي باللي كان .. ماتقولشي دَه كان ليه !! *** رِجع أبو المسلمين ، ع الطفل متأَلِم : ... من نبض قلبُه الحزين ، ينطق ويتكلِّم واكمنُه م المؤمنين ، والصابرين .. سلم ! ... وقال له آمِنت بك يارب ياهادي ياباسِطِ الرزق للحادِي ، وللبادِي ... يارب أَسكنْت من ذُريِّتي وادي ؟ في رحابُه أكرم وِلادي ، يصلِّي ويسلِّم *** يارب .. يا مُطَّلع ، ع القصد والنيّه ... الوادي مَهجور ، لا زرعه فيه ، ولا مَيَّه وأرضه طاهره لكين ، م الخَلق منسيّه ... إكرمني يارب ، يا سامِع دُعا المكروب عِيالي في ظل بيتك يطلبوا مطلوب ... عشان يقيموا الصلا ، مابين شُروق وغروب سكِّن معاهُم قلوب ، مزروعه حنيّه *** إبعت لأولادي ناس يا قابِل الدَّعَوات ... يعمَّروا أرض ربِّ الأّرض والسماوات ويسبَّحوا لِربهم ، ويكتَّروا الصلوات ... أنا اللي هَجَّرتهم ، لكن مِفارقهم وانت هِنا ، ربُّهم ، إنت اللي خالِقهم ... إنت اللي عالِم بُهم ، وانت اللي رازقهم إكرمني ياربِّ وارزقهم ، من الثَّمَرات ***

[عاشق حب الله والرسول]

اقتباس

جزاااااك الله خير اخي
متابعين بازن الله

وجزاكي الله الخير كله إبنتي الفاضلة / ولاء بنت الإسلام .
موفقه بإذن الله ... لكي مني أجمل تحية .